Árið 1925 kom 22ja ára Dani til Íslands, ráðinn til Vöruhússins í Reykjavík.  Hann hét fullu nafni Christian August Otto Kornerup-Hansen.  Þar starfaði hann lengst sem fulltrúi, uns þann fyrsta mars árið 1935 að hann stofnaði innflutningsverslunina Fönix að Suðurgötu 10 í Reykjavík.  Árið 1973 flutti Fönix í nýbyggingu að Hátúni 6a.  Innfluttar heimilisvörur fyrirtækisins hafa einkum komið frá Norðurlöndunum.  Þekktustu vörurnar okkar eru NILFISK ryksugurnar, sænsku ASKO heimilistækin og GRAM kæli- og frystitækin.  Allt fyrsta flokks vörur. 

Í dag starfar fyrirtækið á tveimur mjög ólíkum sviðum.  Fyrir utan raftækjasöluna rekur fyrirtækið einnig Myndbandavinnsluna sem sérhæfir sig í sjónvarpskerfabreytingum og fjölföldun mynd- og hljóðefnis af og á hvaða form sem er.  Myndbandavinnslan yfirfærir einnig 8mm og 16mm filmur yfir á video eða stafrænt form.  Innflutningur og sala á mynd- og tónböndum ásamt CD-R og DVD diskum er mikill.  Myndbandavinnslan hefur einnig aðstoðað innlenda tónlistar- og kvikmyndagerðarmenn við fjöldföldun á efni til útgáfu í samstarfi við Tocano í Danmörku.